seirler.info
Ata və ana
(Elvin Elxanoğlu)
Ata dəyərini bilmək istəsən,
Məzarı başında durandan soruş.
Ana dəyərini bilmək istəsən,
Ağrıdan “ay ana” deyəndən soruş.
Atadı bizlərin arxa-dirəyi,
Onunla çətinlik tanımırıq biz.
Ən zərif ürəkdi ana ürəyi,
O varsa, dünyada yoxdu dərdimiz.
Ata çətin anda gərəyimizdi,
Onunla ən çətin asandı bizə.
Ana qoruyucu mələyimizdi,
Ömrünü calayır o ömrümüzə.
Oğulçün atanın yeri başqadı,
Məğrurluq, kişilik müəllimidi.
Ana nəvazişi bizi yaşadır,
Onlarsız bu həyat zindan kimidi.
#SevgiŞeirləri|#AyrılıqŞeirləri|#VətənpərvərlikŞeirləri