seirler.info
Atadı
(Elvin Elxanoğlu)
Həyatın ən çətin sınaqlarında
Övladın dadına çatan atadı.
Ailəsi çətinlik görməsin deyə,
Gecəni gündüzə qatan atadı.
Hər bir çətinliyə sinə gərsə də,
Nə qədər əziyyət, zülm görsə də,
Səndən bütün dünya üz döndərsə də,
Hər zaman dəyişməz qalan atadı.
Zəhməti özünə peşə biləcək,
Canı ağrısa da, üzü güləcək.
Öl desən, yolunda bu gün öləcək,
Hamıdan fədakar insan atadı.
Ailəsi başını uca edəndə,
Övladını yaxşı övlad görəndə,
Oğul, qız toyunda arzu deyəndə
Sevincdən gözləri dolan atadı.
Hər oğul böyüyüb ata olacaq,
İllər gəncliyini ondan alacaq.
Zamanla qocalıb yaşa dolacaq,
Hər zaman müqəddəs olan atadı.
Övladdan nə qədər ayrı qalsa da,
Çovğunda olsa da, qarda olsa da,
İllərlə yaşlansa, lap qocalsa da,
Övladı yadına salan atadı.
Elvinəm, böyüyə hörmət etmişəm,
Atamı, anamı əziz bilmişəm.
Anama gözümün nuru demişəm,
Başımın tacı hər zaman atadı.
#SevgiŞeirləri|#AyrılıqŞeirləri|#VətənpərvərlikŞeirləri