seirler.info
Atamdır
(Elvin Elxanoğlu)
Bilsinlər həyatımdan əziz canım atamdır.
Əlbət ki, mənim şöhrətim həm şanım atamdır.
Zəhmətlə yaşatmış bizi bu vaxta gətirmiş,
Qaçmış o haramdan, halal insanım atamdır.
Hər kəs də bunun şahidi olmuş, bilir əlbət,
Fəxrimdi, qürurumdu, adım-sanım atamdır.
Məğrurluğu, möhkəmliyi öyrənmişəm ondan,
Gəl gör ki, ən həssas və zəif yanım atamdır.
Hər kəlməsi qanundu mənimçün, böyüyümdü,
Baş tacıdı, şahım və də sultanım atamdır.
Hər kəs atasın qədrini bilsin- deyir Elvin,
Arxam, dayağım, dərdimə dərmanım atamdır.
#SevgiŞeirləri|#AyrılıqŞeirləri|#VətənpərvərlikŞeirləri