seirler.info

    (Musa Yaqub)
    
    Əlçatmaz bilmişəm səni həmişə,
    Sənin gül zirvənə əlim çatarmı?
    İsti baxışına, şirin ləhcənə
    Şeirim yetişərmi, dilim çatarmı?
    
    Bu kövrək sevdaya uyası olsam,
    Səni könlüm dolu duyası olsam,
    Yolunda bir ömür qoyası olsam,
    Buna ömrüm yetər, ilim çatarmı?
    
    Sənin tək bir ümid çırağım olsa.
    Gül bədən, bir qönçə dodağım olsa,
    Dünya başdan-başa gül bağım olsa,
    Sənə veriləsi gülüm çatarmı?
    
    Ömrümün payızı bəndi bağlayan,
    Mən bir quru çayam daşı ağlayan.
    Sən bahar dəryası coşub-çağlayan,
    Sənin dənizinə selim çatarmı?
    
    Torpağı, ağacı sinəsi dağ-dağ,
    Min illər uzunu yanan bir ocaq.
    Bir də alovunda birlikdə yansaq,
    Tabım bu yanğıya, bilim, çatarmı?
  
  

    ______________________________________________
    Teqlər: Musa Yaqub şeirləri, 
    Musa Yaqub çatarmı şeiri,seirler,
    catarmi seiri musa yaqub,super seir,
    şeirlər,musa yaqub seirleri,şeir,seir,
    çatarmı musa yaqub
  
#SevgiŞeirləri|#AyrılıqŞeirləri|#VətənpərvərlikŞeirləri