seirler.info
Darıxmaq nədir?
(Elvin Elxanoğlu)
Sən heç bilirsənmi darıxmaq nədi?
Ağlından çıxarıb ata bilmirsən.
Hər yanda gözünün önündə durur,
Əlini uzadıb çata bilmirsən.
Sən heç bilirsənmi darıxmaq nədi?
Heç odsuz-alovsuz alışmısanmı?
İşıqlar narahat edibmi səni?
Hamıdan qaçmağa çalışmısanmı?
Qaranlıq otağa keçib sonra da
Qapını kilidli saxlamısanmı?
Bir kimsə duymasın deyə hönkürüb
Əlinlə ağzını bağlamısanmı?
Sən heç bilirsənmi darıxmaq nədi?
Zamanla içində bir ümid doğur.
Qəlbinə süzülən o göz yaşların
Həmən o ümidi hər dəfə boğur.
Sən heç bilirsənmi darıxmaq nədi?
Qəlbin sızıldayır xatırlayanda.
Bəzən də yuxuda görürsən onu,
Amma yoxa çıxır sən oyananda.
Sən heç bilirsənmi darıxmaq nədi?
“Düzələr” – deyirsən, heç vaxt düzəlmir.
Sanki gözləyirsən dayanacaqda,
Gözlədiyin qatar gəlmir ki, gəlmir.
Sən heç bilirsənmi darıxmaq nədi?
Darıxmaq bir qəlbin fırtınasıdı.
Nə ölə bilirsən, nə yaşıyırsan,
Yaşamla ölümün astanasıdı.
Darıxmaq qəlbinin tam ortasında
Fırtına qoparan çarəsizlikdi.
Darıxmaq keçmişin axtarışında
Gələcəyə olan ümidsizlikdi.
#SevgiŞeirləri|#AyrılıqŞeirləri|#VətənpərvərlikŞeirləri