seirler.info

    (Cəfər Cabbarlı)

    İşimiz boş danışıq, həmdü sənadır, demədim?
    Ay Baba, işlərimiz xeyli fənadır, demədim?
    
    Millət əfradi unutdu hamı həsbü nəsəbi;
    Elm təhsilinə sərf eylədi həm ruzu şəbi;
    Mən bilən ki, ona lənət oxuyur cəddü əbi,
    Baxmadı hərçi deyib dad elədi Molla Cəbi.
    Rükni-dinin biri də rəngi-hənadır, demədim?
    Ay, Baba, işlərimiz xeyli fənadır, demədim?
    
    Ortaya saldı özündən hərə bir tazə dəbi,
    Nə bilim qız oxusun, bəlkə də olsun ədəbi.
    A kişi, arvad hara, bayram hara, kimdir səbəbi?
    Bir yerə cəmləşib saxlaya mövludi-nəbi?
    Oxumaq milləti-islama bəladır, demədim?
    Ay Baba, işlərimiz xeyli fənadır, demədim?
    
    Qız hara, məktəb hara, dərsü qələmdan hara?
    Elm hara? Bilgi hara? Fatma, Tükəzban hara?
    Ay canım, arvad hara? Zümreyi-insan hara?
    Qız ki, şeytan kimidir, biz hara, şeytan hara?
    Evimiz bir heçin üstündə binadır, demədim?
    Ay Baba, işlərimiz xeyli fənadır, demədim?
    
    Baxın indi oxumuş qızlara tüğyan eləyir;
    Biri cəmiyyət açır, pul yiğir, ehsan eləyir;
    A kişi, arvad da özün bir yekə insan eləyir.
    Tuf belə adətə olsun ki, müsəlman eləyir.
    Arvada layiq olan cövrü cəfadır, demədim?
    Ay, Baba, işlərimiz xeyli fənadır, demədim?
  


    ______________________________________________
    Teqlər:  Cəfər Cabbarlı şeirləri , 
    Cəfər Cabbarlı demədim şeiri,şeirlər,şeir,
    Cəfər Cabbarlı qezelleri,qəzəl,qezel,demədim qəzəli,
    cefer cabbarli demedim seiri,seirler
  
#SevgiŞeirləri|#AyrılıqŞeirləri|#VətənpərvərlikŞeirləri