seirler.info

    (Aşıq Ələsgər)

    Sevdiciyim, hanı gözəllər xanı?
    Güzarımız sizin otağa düşdü.
    Buyursan fərmanı, alarlar canı,
    Püşk atdıq, can sana sadağa düşdü.
    
    Sallan qələm qaşdı, yanı yoldaşdı,
    Qalmışam ataşdı, mən başı daşdı.
    Huş başımdan çaşdı, dilim dolaşdı,
    Gözlərim sataşdı, buxağa düşdü.
    
    Ətlazdan qəbalı, belində şalı,
    Gövhərdən bahalı üzündə xalı.
    Geydi yaşıl-alı, yaxdı mahalı,
    Əyri tellər ayna qabağa düşdü.
    
    Yeriyirdi sana yaşılbaş, sona,
    Yaraşır canana ağ nazik cuna,
    Tellərində şana, əlində həna,
    Yəmən, yaqut əhmər dodağa düşdü.
    
    Çox çəkmişəm cəfa, gəl bir insafa,
    And olsun Mushafa, olmam bivəfa.
    Gəlmişəm təvafa, verəsən şəfa,
    Ələsgər xəstədi, ocağa düşdü. 
  
  
  
    _______________________________________________
    Teqlər: Aşıq Ələsgər şeirləri, 
    Aşıq Ələsgər düşdü şeiri ,  şeir , qoşmalar ,
    Aşıq Ələsgər qoşmalar, Asiq Elesger seirleri ,
    Aşıq Ələsgər müxəmməslər , Aşıq Ələsgər gəraylılar ,
    Aşıq Ələsgər təcnislər , super şeirlər, şeirlər ,
    Aşıq Ələsgərin qoşma və gəraylıları , seirler 
  
#SevgiŞeirləri|#AyrılıqŞeirləri|#VətənpərvərlikŞeirləri