seirler.info
Gedərəm
(Aytəkin Səfərəliyeva)
Qırsan da qəlbimi sağ ol söyləyib,
Bir bəndlik şeirə sığıb gedərəm.
Söküb hərf-hərf dilindən sənin
Adım, sanımı yığıb, gedərəm.
Bəxtinin daşına toxunar ayaq,
Edərsən hamıdan eşqini soraq,
Dön düyə yazsan da, hər gün bir varaq,
Yazdığın hər sözü yaxıb gedərəm.
Baxıb yollarıma xəyala dalsan,
Hərdən xatırlayıb, yadına salsan,
Bir qurtum içməyə su deyə alsan,
Süzülüb ovcundan axıb, gedərəm.
Gözümün yaşında avar çəkmisən,
Mənim kədərimdən qübar çəkmisən,
Bizim aramıza divar çəkmisən,
Çəkdiyin divardan baxıb, gedərəm.
Səni yandıran od közümdən düşüb,
Ürəyim taqətdən, dözümdən düşüb,
Olduğun şəhər də gözümdən düşüb,
Sən olan hər yerxən çıxıb gedirəm.
Demək duzsuz olar nankörə çörək,
Heç vaxt cəhənnəmə əkilməz çiçək,
Bir də sənin üçün döyünsə ürək,
Başına dünyanı yıxıb, gedərəm.
_______________________________________________
Teqlər: Aytəkin Səfərəliyeva şeirləri
#SevgiŞeirləri|#AyrılıqŞeirləri|#VətənpərvərlikŞeirləri