seirler.info

    (Nəriman Həsənzadə)

    Yaşım səksəni haqladı,
    keçdiyim yollar hardadı?
    Haraya gedirəm, Tanrım,
    görünən dağlar hardadı?
    
    Gəzib torpaqlar görmüşəm,
    qaralar, ağlar görmüşəm,
    ölkələr, xalqlar görmüşəm,
    hanı o xalqlar hardadı?
    
    Kimin üstündə əsirəm,
    nəyim itib, nə gəzirəm?
    Hara belə tələsirəm,
    bizim yaylaqlar hardadı?
    
    Çiynimdən uçdu şah quşum,
    yerindədi ağlım, huşum.
    Ələndi getdi tay-tuşum,
    tək-tük o sağlar hardadı?
    
    Bulanıram, duruluram,
    öz içimdə qovruluram.
    Yeriyirəm, yoruluram,
    dəmir ayaqlar hardadı?
    
    Ağsaqqal olmaq buydumu,
    Gördüklərim yuxuydumu?
    Varıydımı, yoxuydumu,
    Ötən o çağlar hardadı?!
    
    Dost qocalıb, yar qocalıb,
    Can alan canlar qocalıb.
    Məndən cavanlar qocalıb,
    Məndən ahıllar hardadı.
  
  

    ______________________________________________
    Teqlər: Nəriman Həsənzadə şeirləri, 
    Nəriman Həsənzadə hardadı şeiri,şeir,
    hardadir seiri, seirler,
    Yasim sekseni haqladi, şeirlər,
    hardadi seiri neriman hesenzade
  
#SevgiŞeirləri|#AyrılıqŞeirləri|#VətənpərvərlikŞeirləri