seirler.info
Hərbçi olmaq
(Elvin Elxanoğlu)
Hər kəs yatan zaman o oyaq qalır,
Düşmənin canına vahimə salır.
Şəhidlərə görə intiqam alır,
Mübariz olmaqdı hərbçi olmaq.
Yolu şərəflidi, ucadı başı,
Qardaşdan yaxındı hər silahdaşı.
Düşmən əl uzatsa, əzilər başı,
Vətəni sevməkdi hərbçi olmaq.
“Hər şey vətən üçün” olub şüarı,
Həmişə qətidi onun qərarı.
Azərbaycan adlı doğma diyarı
Daim qorumaqdı hərbçi olmaq.
İşğalla barışmaz heç vaxt, heç zaman,
Apreldə düşmənə vermədi aman.
Bu gün Qarabağda dastanlar yazan
Qəhrəman olmaqdı hərbçi olmaq.
Vətən anamızdı, qoruyaq gərək,
Gecə də, gündüz də keşik çəkərək.
Torpağı canından üstün bilərək
Canından keçməkdi hərbçi olmaq.
#SevgiŞeirləri|#AyrılıqŞeirləri|#VətənpərvərlikŞeirləri