seirler.info

    (Nüsrət Kəsəmənli)
    
    Bir lal xəritədir, ana, sifətin
    Demə ki, mən hara, xəritə hara.
    Qara xal elə bir dövlət mərkəzi
    Qırışlar yol kimi uzanıb ora.

    Atamın baxışı od-alov imiş,
    Neçə ürəklərə közü düşübdür.
    Sənə də sözünü gözüylə demiş
    Yoxsa baxışının izi düşübdür.

    İllər öz atını çapıb getdimi,
    Bir Ömrün yolları yatıb üzünə.
    Bəlkə də qiymətli bir sənəd kimi
    İllər imzasını atıb üzünə...

    Böyütdün sən məni bir arzu kimi,
    Gözümdə gözünün qarası qalıb.
    Gəncliyin illərlə axıb su kimi
    Üzündə dolaşıq məcrası qalıb.

    Xatirə səpilib o qırışlara
    Min hikmət söyləyər,
    birin, dindir.
    Mən özüm, mən
    Özüm səninəm, ana
    Bəs o qırışlardan hansı mənimdir?..
    Bir lal xəritədir, ana, sifətin
    Demə ki, mən hara, xəritə hara.
    Qara xal elə bir dövlət mərkəzi
    Qırışlar yol kimi uzanıb ora.
  
  
    _____________________________________
    Teqlər:  Nüsrət Kəsəmənli şeirləri 
            Nusret Kesemenli , seirler
            Nusret Kesemenli seirleri ,
            lal xəritə şeiri ,
            lal xerite , ayrılıq şeirləri
            sevgi şeirləri , super şeir
#SevgiŞeirləri|#AyrılıqŞeirləri|#VətənpərvərlikŞeirləri