seirler.info

    (Zəlimxan Yaqub)
    
    Şuşada bir doyunca
    Könlümdən gəzmək keçir,
    o günü gözləyirəm.
    Qalxıb Cıdır düzünə
    Gülümü dərmək keçir,
    o günü gözləyirəm.
    
    Coşa İsa bulağı,
    Qəlbə süzülə, axa.
    Ovcum nur ilə dola,
    Gözüm gözünə baxa,
    o günü gözləyirəm.
    
    Məni Şuşada görə,
    Düşmən baxa xar ola.
    Daşaltının hər daşı
    Düşmənə məzar ola,
    o günü gözləyirəm.
    
    Öz gülüm, öz çiçəyim
    Öz əlimlə dərilə.
    Görə bu xoş günləri,
    Şəhidlərim dirilə,
    o günü gözləyirəm.
    
    Qarabağ deyiləndə
    Torpaq qalxa ayağa.
    Ehtiyacı olmaya
    Bir səddə, bir dayağa,
    o günü gözləyirəm.
    
    Şuşasız varlığımda
    Nə ürək var, nə də can.
    Ağ atın üstə gələ
    Ulu dədəm Pənah xan,
    o günü gözləyirəm.
    
    Hanı Şuşa torpağı,
    Gülü kəfənim olsun.
    Mənimdir, mənimkidir,
    Həmişə mənim olsun.
    o günü gözləyirəm.
    
    Mənim ağ paltarımda,
    Hələ qara yamaq var.
    Şuşasız yaşamaq yox,
    Şuşalı yaşamaq var,
    o günü gözləyirəm.
    
    Tarixi düz yazıla,
    Şuşa Şuşamız ola.
    Bu dünyaya sığmayan
    Bir tamaşamız ola,
    o günü gözləyirəm.



    ______________________________________________
    Teqlər: Zəlimxan Yaqub şeirləri, 
    Zəlimxan Yaqub o günü gözləyirəm,şeir,
    o gunu gozleyirem zelimxan yaqub,seir,
    zelimxan yaqub seirleri,şeirlər,seirler
  
#SevgiŞeirləri|#AyrılıqŞeirləri|#VətənpərvərlikŞeirləri