seirler.info
Oldum
(Rəşad Azəri)
Gözəlliyi göz oxşayır gözündə,
İstəyirsən alışasan közündə.
Sevgi dolu qəmzələr var sözündə,
Bir gözəlin camalına göz oldum.
Bu nə dərddir, dəvasından xəbər yox,
Çarəsi yox, şəfasından xəbər yox.
Qanunu yox, cəzasından xəbər yox,
Yananların yanğısından köz oldum.
Oğurladın sevgimi eşq bağımdan,
Aşiq oldum səni görən çağımdan.
Gül-çiçəkli, laləzarlı dağımdan
Gəlib keçən yollarına iz oldum.
Saf eşqimə qucaq açan qol ola,
Sevgi yolu bənövşədən kol ola.
Arzuların arzusuna yol olan,
Ürəkləri ovsunlayan söz oldum.
_______________________________________________
Teqlər: Rəşad Azəri şeirləri
#SevgiŞeirləri|#AyrılıqŞeirləri|#VətənpərvərlikŞeirləri