seirler.info

    (Musa Yaqub)
    
    Payızın hökmüylə əsdi bir külək,
    Bir yaşıl səltənət çovğuna düşdü.
    Ağaclar bir yaş da qocaldı demək,
    Bir yarpaq nəsli də qırğına düşdü.
    
    Aldı verdiyini geriyə torpaq,
    Qazancı nə oldu bağın-bağçanın.
    Bir yarpaq boy atdı körpə bir uşaq,
    Ömründən bir yarpaq düşdü qocanın.
    
    Palıdlar tab etdi sükuta, yasa,
    Gilas yarpaqları qızardı düşdü.
    Hansı bəxtəvərin, növcavanınsa
    Üzünə bir yarpaq qızartı düşdü.
    
    Çox yarpaq tökümü görüb yerimiz,
    Soraq tutmaq olmur cığırdan, izdən.
    Torpaq altındakı əzizlərimiz
    Yenə də bir yarpaq gen düşdü bizdən.
    
    Bir yarpaq da düşdü Bəzz qalasına,
    Divarlar bir yarpaq çökdü aşağı.
    İgid Babəklərin, Koroğluların
    Bir yarpaq uzaqdan gəldi sorağı.
    
    Yarpaqlar, belədir zamanın hökmü,
    Tökülün, əbədi ömrə tamarzı.
    Tarixin yüz ilik yarpaq tökümü
    Olacaq bir yarpaq yaddaş kağızı.
    
    Payızın ağzından əsdikcə külək,
    Bir yaşıl səltənət çovğuna düşdü.
    Ağaclar bir yaş da qocaldı demək,
    Bir yarpaq nəsli də qırğına düşdü.
  
  

    ______________________________________________
    Teqlər: Musa Yaqub şeirləri, 
    Musa Yaqub payız duyğuları şeiri,seirler,
    payiz duygulari seiri musa yaqub,super seir,
    şeirlər,musa yaqub seirleri,şeir,seir,sevgi şeirləri,
    payız duyğuları musa yaqub 
  
#SevgiŞeirləri|#AyrılıqŞeirləri|#VətənpərvərlikŞeirləri