seirler.info

    (Zəlimxan Yaqub)
    
    Mən bir dağ çayıyam, dağ bulağıyam,
    Mənim çoxalmağım, azalmağım var.
    Gəlir bu bağların təbiətindən,
    Coşub-daşmağım var, sozalmağım var.
    
    Sözdən öz ömrümə bir heykəl yonub,
    Gözəllik önündə heyrətdən donub,
    Arıtək çiçəkdən-çiçəyə qonub,
    Dədə ocağından köz almağım var.
    
    Suyam – damla-damla daşdan çıxmışam,
    Gözəm, göz yaşıyam, yaşdan çıxmışam.
    Bir qarlı, boranlı qışdan çıxmışam,
    Təzə çiçəklənib yaz olmağım var.
    
    Duyğular bağında güllər bitirib,
    Bir ömrün içində min ömür sürüb,
    Şairtək əlinə qələm götürüb,
    Aşıqtək sinəmə saz almağım var.
    
    Bənzər xəyalımız uçan quşlara,
    Tarix qiymət verər uca başlara.
    Ulu qayalara, qızıl daşlara,
    Qədim əlifbatək yazılmağım var.
  
  

    ______________________________________________
    Teqlər: Zəlimxan Yaqub şeirləri, 
    Zəlimxan Yaqub portret şeiri,şeir,portret,
    potrtet seiri zelimxan yaqub,seirler,seir,
    zelimxan yaqub seirleri,şeirlər
  
#SevgiŞeirləri|#AyrılıqŞeirləri|#VətənpərvərlikŞeirləri