seirler.info

    (Musa Yaqub)
    
    Leyləklərin çöp yuvası boş qalıb,
    Bahar gedib, payız gəlib, qış qalıb.
    Göy çəməndə ocaq yanıb, daş qalıb,
    Bu dünyanın qara daşı göyərməz.
    
    Nə o ocaq közərəsi, sönəsi,
    Nə o günlər bir də geri dönəsi…
    Qəm eləmə, könlümün bir dənəsi,
    Bu dünyanın qara daşı göyərməz.
    
    O gülyanaq bənddir bir xoş baxışa,
    Körpə budaq əl açıbdır yağışa.
    Min baharın hərarəti yığışa,
    Bu dünyanın qara daşı göyərməz.
    
    Ot göyərdib o cığırım, o izim,
    Tufanlanıb çalxalanmaz dənizim.
    Daha məndən sevgi umma, əzizim,
    Bu dünyanın qara daşı göyərməz.
    
    Araz boyu çox mənalar sezmişəm,
    Elə bilmə əllərimi üzmüşəm.
    Ürəyimə daş bağlayıb dözmüşəm,
    Bu dünyanın qara daşı göyərməz.
  
  

    ______________________________________________
    Teqlər: Musa Yaqub şeirləri, 
    Musa Yaqub bu dünyanın qara daşı göyərməz şeiri,
    Bu dunyanin qara dasi goyermez seiri musa yaqub,
    şeirlər,musa yaqub seirleri,şeir,seir,
    Bu dünyanın qara daşı göyərməz,sevgi şeirləri
  
#SevgiŞeirləri|#AyrılıqŞeirləri|#VətənpərvərlikŞeirləri