seirler.info

    (Zəlimxan Yaqub)
    
    Çöldə çiçək oldum, çəməndə naxış,
    Şimşəkdə od oldum, buludda yağış.
    Sirli bir göz gördüm, nurlu bir baxış,
    Çevrildim çeşməyə, qarışdım çaya,
    Səni sevmək üçün gəldim dünyaya.
    
    Mən min il əvvəl də gələ bilərdim,
    Min ildən sonra da ölə bilərdim.
    Zamanı başqa cür hesablayardım,
    Vaxtı başqa cürə bölə bilərdim.
    Düşüb sən doğulan həftəyə, aya,
    Səni sevmək üçün gəldim dünyaya.
    
    Səsini eşitdim, səsdən səs aldım,
    Şaqraq gülüşündən güc, həvəs aldım.
    Sən nəfəsim oldun, mən nəfəs aldım,
    Muştuluq verdilər Günəşə, Aya,
    Səni sevmək üçün gəldim dünyaya.
    
    Neçə dinsizləri dinə gətirdim,
    Qorudum, sünbülü dənə gətirdim.
    Könlümdə nə varsa, sənə gətirdim,
    Mənim yollarımı kəsə bilmədi
    Nə sərhəd, nə dəmir, nə daş, nə qaya,
    Səni sevmək üçün gəldim dünyaya.
    
    Məcnun da, Kərəm də, Fərhad da mənəm,
    Məcnuna, Fərhada qanad da mənəm.
    Ölüm də, sevgi də, həyat da mənəm,
    Şükür Yaradanın verdiyi paya,  
    Səni sevmək üçün gəldim dünyaya



    ______________________________________________
    Teqlər: Zəlimxan Yaqub şeirləri, 
    Zəlimxan Yaqub səni sevmək üçün gəldim dünyaya,
    seni sevmek ucun gelmdim dunyaya zelimxan yaqub,
    zelimxan yaqub seirleri,şeirlər,şeir,super seir
  
#SevgiŞeirləri|#AyrılıqŞeirləri|#VətənpərvərlikŞeirləri