seirler.info

    (Xalidə Nuray)
    
    Ruhum sızıldayır, qəlbim ağlayır,
    Həsrətin sazağı dərd sığallayır,
    Sənli xatirələr könül dağlayır,
    Gəl al bu qəhərin əlindən məni…
    
    Ürəyim gizlədi dərdi özündə,
    Sinəmdə dil açıb, yanan közüm də,
    Səni tapammıram artıq özüm də,
    Gəl al bu kədərin əlindən məni…
    
    Qurdum ilmə-ilmə taxt sarayımı,
    Uçurdum əlimlə baxt sarayımı,
    Susdura bilmədim eşq harayımı,
    Gəl al bu dərd-sərin əlindən məni…
    
    Könlümdə qurduğun könül üşüyür,
    Dərib gətirdiyin o gül üşüyür.
    Yanan o dodaqlar, o dil üşüyür,
    Gəl al bu rüzgarın əlindən məni.
    
    İlahi yazdığı gözəl qismətin,
    Dəyərin bilmədik ilk məhəbbətin,
    Sevda qələmiylə yazdı nifrətin,
    Gəl al bu qədərin əlindən məni.



    ______________________________________________
    Teqlər: Xalidə Nuray şeirləri, 
    Xalidə Nuray ruhum sızlayır şeiri,
    ruhum sizlayir seiri Xalide Nuray,
    xalide nuray seirleri,şeirlər,şeir
  
#SevgiŞeirləri|#AyrılıqŞeirləri|#VətənpərvərlikŞeirləri