seirler.info
Tək gerçək
(Elvin Elxanoğlu)
Dünyanın işindən baş açmaq olmur,
Yarısı gündüzdü, yarısı gecə.
Elə bilirsən ki, üzünə gülür,
Sən demə, planlar qurur gizlicə.
Bəzən acımasız olur bu dünya,
Gözünün yaşına belə baxmayır.
Artıq böyüdükcə başa düşürəm:
Dünyaya göz açan niyə ağlayır.
Uşaqkən deyirsən – Dünya sənindi,
Bütün sevdiklərin yanında olur.
İllər sonra həmin o sevdiklərin
Keçmişdən şirin bir xatirə qalır.
Hərdən darıxırsan, canın istəyir,
Əlini uzadıb çata bilmirsən.
Bəzən yatağına uzansan belə,
O uzun gecəni yata bilmirsən.
Kaş gerçək olardı bəzi nağıllar,
Kaş işıqlı dünya zəfər çalardı.
Sehrli lələyi yandıran kimi
Ən böyük diləyin gerçək olardı.
Dönərdim bir günlük uşaqlığıma,
Babama, nənəmə baxıb gələrdim.
Bütün ölənləri ziyarət edib
Başdaşından öpüb çıxıb gələrdim.
Bilirəm, nağıllar elə nağıldı,
Bu da bu dünyanın bir oyunudu.
Yaranmış gedəcək fani dünyadan,
Bu yalan dünyada tək gerçək budu.
#SevgiŞeirləri|#AyrılıqŞeirləri|#VətənpərvərlikŞeirləri