seirler.info

    (Zəlimxan Yaqub)
    
    Təntiməyin, tələsməyin, çaşmayın,
    Yerli-yersiz həddinizi aşmayın,
    Qazan gəlib qaynamamış daşmayın,
    Yoldaşımız səbr, dözüm olacaq,
    Bugün-sabah dünya bizim olacaq.
    
    Vaxt Təbrizin, dünya Ərkin dünyası,
    Yol Tanrının, haqqı dərkin dünyası,
    Əvvəl-axır dünya Türkün dünyası,
    Üç gün, beş gün gecim-tezim olacaq,
    Bugün-sabah dünya bizim olacaq.
    
    Şəhid verin, qurban verin, can verin,
    Cansızlara şah damardan qan verin,
    Gəmi kimi sahillərə yan verin,
    Müjdəçilər düzüm-düzüm olacaq,
    Bugün-sabah dünya bizim olacaq.
    
    Düşmən məni düz düşünməz, çaş anlar,
    Haqq sözümü qaya duyar, daş anlar,
    Qayıdacaq Çin səddini aşanlar,
    Tarixlərə təzə sözüm olacaq,
    Bugün-sabah dünya bizim olacaq.
    
    Keçidlərdə ocağımız səngidi,
    Yoxuşlarda nəfəsimiz təngidi,
    Tarix bir az haqq sözündə ləngidi,
    Həqiqətlər çözüm-çözüm olacaq,
    Bugün-sabah dünya bizim olacaq.
    
    Yeni düzən, yeni mizan qurandı,
    İlk andımız, son andımız Turandı,
    Soraq verən peyğəmbərdi, Qurandı,
    Nə yozulsa xeyrə yozum olacaq,
    Bugün-sabah dünya bizim olacaq.
    
    Qovuşacaq bölünənlər, bölgələr,
    Nurlanacaq qaranlıqlar, kölgələr,
    Diriləcək Oğuzxanlar, Bilgələr,
    Türkə səcdə, Türkə təzim olacaq,
    Bugün-sabah dünya bizim olacaq.



    ______________________________________________
    Teqlər: Zəlimxan Yaqub şeirləri, 
    Zəlimxan Yaqub dünya türkün olacaq şeiri,
    dunya turkun olacaq seiri zelimxan yaqub,
    zelimxan yaqub seirleri,şeirlər,seirler
  
#SevgiŞeirləri|#AyrılıqŞeirləri|#VətənpərvərlikŞeirləri