seirler.info
Vəfasız dünya
(Elvin Elxanoğlu)
Çox fikir eyləmə, tez qocalarsan,
Bu dünya çoxunu yola salıbdı.
Dünyaya ağalıq edən çox olub,
Hansı bu dünyanı tutub qalıbdı?
Heç kimin qəlbini gəlin qırmayın,
Yerə yıxılanı siz də vurmayın.
Namərdin önündə boyun burmayın,
Bir də görərsiz ki, sizi satıbdı.
Hərə xoşbəxtliyi bir şeydə görür,
Kimisi ağlayır, kimisi gülür.
Əlində olana etginən şükür,
Çoxu onlara da həsrət qalıbdı.
Gedin sevginizdə sonuna qədər,
Çalışın, sevginiz olmasın hədər.
Etmə vəfasızlıq, yoxsa bir səhər
Görərsən onu da özgə alıbdı.
Qədrini bilginən ata-ananın,
Sağkən qulluğunda möhkəm dayanın.
Bir zaman sağ olan nənə-babamın
Məzarı üstündə daş dayanıbdı.
Aldanma heç zaman vara-dövlətə,
Çoxunu salıbdı bil ki, zülmətə.
Hər nə istəyirsən, Allahdan istə,
Allahdan başqası yalan olubdu.
Ömür çox qısadı, mənalı yaşa,
Həmişə dayaq ol dosta, qardaşa.
Göz açıb yumunca görəcəksən ki,
Qocalıq səni də tora salıbdı.
Dünyadan özünlə yaxşılıq apar,
Nə etsən, dolanıb qarşına çıxar.
Elvin, yaşayırsan çiçəkli bahar,
Unutma, qarşıda qış dayanıbdı.
#SevgiŞeirləri|#AyrılıqŞeirləri|#VətənpərvərlikŞeirləri