seirler.info

    (Zəlimxan Yaqub)
    
    Ömür bir fürsətdi verilib sənə,
    Ömürdən, fürsətdən yaz qələmim, yaz.
    Yaradan dünyanı cənnət yaradıb,
    Sehrli cənnətdən yaz qələmim, yaz.
    
    Çağır ilhamını, çağır təbini,
    Həm elmini göstər, həm ədəbini.
    Dəryalardan götür mürəkkəbini,
    Tükənməz hikmətdən yaz qələmim, yaz.
    
    Heç vaxt yaxşılığı çıxarma yaddan,
    Dadlı meyvələrin düşməsin daddan.
    Sən ki, çox çıxmısan alovdan, oddan,
    Taledən, qismətdən yaz qələmim, yaz.
    
    Odu olmayanın oduna yanma,
    Haqqı olanların haqqını danma.
    Yaxşılıq etməyi qızırqalanma,
    Bu ali qüdrətdən yaz qələmim, yaz.
    
    Dağ qalır, daş qalır, təbiət qalır,
    İnsana əbədi məhəbbət qalır.
    Çox şey unudulur, həqiqət qalır.
    Əsl həqiqətdən yaz qələmim, yaz.
    
    Açılan çiçəkdi, qonan arıdı,
    Yönü Aya sarı, günə sarıdı.
    Şeir şairlərin könül varıdı,
    Bu naz-nemətdən yaz qələmim, yaz.



    ______________________________________________
    Teqlər: Zəlimxan Yaqub şeirləri, 
    Zəlimxan Yaqub yaz qələmim yaz şeiri,şeir,
    yaz qelemim yaz seiri zelimxan yaqub,seir,
    zelimxan yaqub seirleri,şeirlər,seirler
  
#SevgiŞeirləri|#AyrılıqŞeirləri|#VətənpərvərlikŞeirləri