seirler.info
Yer üzündə belə gözəl yoxdu, yox
(Asim Yadigar)
Yer üzündə belə gözəl yoxdu, yox,
Göydən enmiş mələkmidir yoxsa o.
Gözəl qızlar vallah eylər pərəstiş,
Hansı qızın qarşısına çıxsa o.
Təbəssümü çiçək açıb üzündə,
Gözlərinin atəşində yanıram.
Bir əzizim, doğmam deyil dünyada
Niyə onu qəlbimə dost sanıram.
Onu görcək lal oluram elə bil,
Dil-dil ötən dilim susur, kiriyir.
Min naz satır yeriyəndə yollara,
Baxın, görün nə naz ilə yeriyir!
Hər gülüşü, təbəssümü işvəli,
Nazı ilə bu dünyaya naz satır.
Cürətim yox bircə kəlmə söz deyim,
Ürəyimi misra-misra oynadır.
Mən olaydım kaş bu gülün bağbanı,
Kaş bu gülü bağçasından dərərdim.
Əsməsəydi qocalığın yelləri,
Ürəyimi bu gözələ verərdim.
______________________________________________
Teqlər: Asim Yadigar şeirləri
#SevgiŞeirləri|#AyrılıqŞeirləri|#VətənpərvərlikŞeirləri